EWA NANG N SHUT AI (daw 2 )

Karai Kasang a Yaw Shada Lam

1. Shinggyim masha ni hpe Karai Kasang hpan da ai a tsaw htum ai yaw sahda lam gaw, shada tsawra kanawn mazum mayat maya let tsawm htap ao shinggyim wuhpawng byin wa na hte,mungkan hpe nta madu kaja zawn vausin makawp maga sa wa na lit kaba hpe ap ya na matu rai nga ai.
Shaloi Karai Kasang shan hpe shaman ya nna , Karai Kasang shan hpe tsun mu ai gaw , Nan Kashu kasha shaprat nna mayat maya wa mu: ga ting hpe jahpring nna dai hpe up nga mu: nammukdara hta rawng ai nga ni a ntsa e mung , lamu kata na ntsaw e mung , ga ntsa e nsoi nsa rawng ai shamu shamawt chye ai baw mahkra a ntsa e mung a up nga mu, ngu wu ai.
(N.N 1:28)

2. Ndai yaw shada lam hpring tsup wa lu na matu shing gyim masha ni hta hpaji machye machyang nga ra ai majaw , kaja ai n kaja ai chye ginghka lu na htau li htau la nyan bawnu jaw ya ku ai namsi hpun hpe hpan dat ai hte , dai asi jpe chye sah wa hkra hpaji ninghkring Lapu hpe lam madun sharin shangun dat ai rai nga ai.

3. Namsi hpe sha ai hte ,Adam hte Ewa myi hpaw mat nna, shada La / Num nbung ai lam ni hpe mu mada wa, langai hte langai myit shang sha tswara wa nna , shada kanawn mazum nga sha chye wa ai majaw kashu kasha ngu mung mayat maya wa ai rai nga ai.Lama wa dai namsi hpe nsha hkrup yang gaw , shada myit shang sah hkat wa na hkum tsun , kadai num kadai la re pyi nchye ginghka ai du ladi masha tai, Karai Kasang ai yaw shada lam munghpring tsup wa na mung nmai byin nga ai.

4. Hpaji nchye , kaja nkaja ai mung nchye ginghhka ai rai yang , gara hku nna Karai Kasang shangun ai bungli rai nga ai mungkan hpe up hkang makawp maga sa wa na lit kaba hpe gunhpai lu na rai ta ?

5. Dai majaw Karai Kasang gaw Adam yan Ewa hpe Hpaji Gindai Edin Sun kaw hpaji sharin achyin ya ai hte, kam ram sai, hpaji chye masai nga ai hte mungkan de shi shangun ai lit hpe gunhpai sa wa lu na matu Edin sun kaw nna pru hkawm wa shangun dat ai rai nga ai.Ya prat hku tsu nga nga yang Edin Sun gaw Hpaji lam magup sumhpa hpe sharin ya nga ai jawng , College, Dakasu ni hte bung nga ai.Ga shadawn , Myen mung a Chyum dakasu Kaba rai nga ia MIT jaw D.Min, M.Th,M.Min, M.Div, M.T.S , MACS, BARS program ni jaw ya nga ia.BARS program kaw sha pyi dai ni mungkan hta chye mai ai hpaji hkum sumhpa Liberal Arts ni hpe sharin ya nga ai re. Manu dan kaja dik ai hpaji ni hpe lata la atsawm hkrak chye chyang hkra sharin hkam la ngut jang she Dakasu kaw na awng Lakmat shagrau ya ai hte tinang a dinghku, myu, mungdan, makau grupyin hpe dawjau lu na matu pru sa wa shangun nga ai re.


Ga Hpungdim

Daini mungkan hta ( Hkristan ni da, kaga Hkristan nre ai ni mi da ), Ewa hpe "Mara Kanu Ewa "mara hpe npawt hpang dat ai wa, lama ma galaw shut jang mung "Ewa a majaw rai nga ai " ngu nna lata layung madun chye nga ga ai. Dik shale , num ni hpe pyi "Ewa amyu ni" ngu nna asawng chye nga ga ai. Lahta de tsun lai wa sai hte maren , Chyum laika hta rawng ai Adam yan Ewa maumwi hpe atsawm sha bai hti yu ai shaloi gaw, Ewa hpe mara kanu ngu tsun na lam hpa nnga ai. Mara a npawt mung Ewa nre a lam asan sha chye saga ai. "Mara kanu Ewa " ngu tsun jahpoi na malai, " chyeju madu Ewa " ngu pyi shagrau sha-a ra nga ga ai. Hpa majaw ta ???

1. Karai Kasang a yaw shada lam hpe jahpring shatsup ya dat ai.

2.Karai Kasang jaw da ai shinggyim ahkaw ahkang hpe jaw ang ai hku jai lang ai.

3. Hpaji machye machyang asi a lam hpe shawng chye na ai hte dai hpe sha na matu gwi gwi daw dan ai, shi nan shawng di sha ai.

4. Tinang hkrai myi hpaw chye chyang jang rai sai ngu ai tinggyeng myit jasat n rawng ai sha, madu wa Adam hpe mung chye chyang shangun mayu ai majaw , tsawra shawang myit kaba hte garan jaw sha dat nga ai.

5. Kashu kasha mayat maya ai Dinghku , hpaji machye machyang hte gaw de sa wa ai shinggyim wuhpung wuhpawng hpe npawt woi hpang dat ai rai nga ai.

Dai majaw Ewa hpe " Nang nshut ndai ! " ngu.....
Chyeju Kaba Sai " Chyeju Madu Ewa ! " ngu....


TANG MADUN AI : AH GU SAM