chyeju dum ai.....

Myu ga kaw shangai na nga kaba wa ai ma ni hpe mu yang ngai na ma prat hpe bai myit dum wa ai.
ginsup na shara n-nga , mawdaw nsen ,wanhkuk nsa sha marawp na kaba wa ra ai myu ga na ma ni a prat wa...
shai ai ...grai nan shai ai....
Ngai kaji ten hta gaw grai ginsup lai wa sai...nta hpang kaw gaw Chyandaw Hka nga ai majaw shani shagu ngu na daram hka hpung yawt , jan kra , manang ni hte zai bru jang hkan grai pyaw lai wa sai....
Shana maga jan shang wa yang bawlung pa kaw nta makau na manang ni hte shata jan pru du hkra ginsup lai wa sai hpe ya ngai Yangon ga shata jan nmu yang dai ten hpe grai marit ai.....Ginhtawng ta hta hkahkawng mayan hkan garet hkawm na mahkaw si ni tam sha , magyeng si ni tam sha hkawm , loi ba yang hka makau na hpun shing nip hkan hkring la , shing gyim ga ni hpe la kasha manang ni gaw htu ya ...anhte num kasha ni gaw shing gyim gyin na jahkraw ......aga....pyaw la ai ma prat ten wa le .......ngai bai sum ru dat shagu myit dik ai ma prat ......

Anhte mare gaw grai mying ka ba ai re...Chyan Daw mare nga ma ai....hpa majaw mying kaba ai ta ???
ngai na Kawa ni a prat hta gaw kan ni grai dut sha ai mare re...
ya...ngai na ban hta gaw kanni nnga sai.....tim....jinghpaw tsa jet jet shapraw ai mare re....
mare ting ngu na ram tsa shadu ma ai.....hting gaw hting dang daram sha hkauna , asuya magam gun, hpung magam gun galaw ma ai.......tsa shadu , wa yaw ai hpe business hku madung galaw ma ai.....dai majaw tsa ya , kanni ya ni grai sawng ai shara re ...tim..lagu lagut ai lam gaw n-nga ai daram re....tsa sha gaw gara sum de shang dat tim gumhpraw njaw ra ai sha gawm mi gaw lu lu chyalu sha re......

Ndai zaw nre mare kaw shani shana nga kaba wa ai ngai hpe laika hti mayu ai myit bang ya ai gaw Ah Wa re...
Ah Wa gaw asuya rung kaw magam gun ai ...shabrai nlaw ai..tim...bat shagu , shata shagu pru ai Shwe Twe , Moe tauk Pann Do chyawng Tar ,zawn re ai laika ni hpe man man mari ya ai.....ngai mung ah wa rung kaw na wa yang laika buk mari wa na hpe la chye ai myit rawng wa sai......kalang lang gaw ngai hpe nan laika buk seng de woi sa na laika buk lata shangun chye ai.....ah wa hte rau lagaw leng jawn hkawm ai ten ni gaw pyaw dik ai ten ni re......
ya ngai , myu ga kaw bus hpe matsut matsat jawn ra ai ten hta Wa a lagaw leng hpe marit ai...

Jawng laika hpaji gaw tsang kaji ten grai anya ai wa re....hpa majaw nga yang , myen ga mung atsawm nchye , ngai lung ai jawng kaw jinghpaw manang mung n-nga , hkrap chyu hkrap na tsang kaji hpe lai kau da sai....
Tsang langai lung ai ten hta gaw myen ga mung chye na wa sai majaw laika loi li lu hkan wa sai...
tim... ngai gaw grai nan careless byin ai ma re...Maths htai yang galoi mung amat hpring nlu ai...aw ra kaw ra dat , ndai kaw ngam dat hte .......Maths san poi kaba htai ai shani hpe nye prat hta galoi mung malap nlu ai....ngai na careless byin ai a marang e chye nga ning len mahtai ni shut mat ai majaw nta du ai hte kawa lasik she daw ayai mat hkra gayet katut ga sai...
gayet ai gaw Ah Nu re ....dai shani kaw na Ah Nu a myit hpe ngai chyena mat ai...aw..nye nu gaw myit kadun chye ai...bai..ngai hpe hpaji grai ram shangun mayu ai...kum hpa ni mung lu shangun mayu ai myit rawng nga a hka !!!

Tsang lahakwng kaw na gaw ngai grai shakut sai....ah nu a kawa lasik hpe hkrit na sha gaw nre , ngai nan mung jawng kaw masha ni kum hpa shagrau hkrum ai mu yang , grai lu mayu wa ai....dai kaw na gaw ding yang shakut mat ai .....tsang shi awng sai...jan mau gup lu sai.....ah nu grai byin shangun mayu ai tsi sara wun wa mi nbyin tim....nlaw htum tinang a ding hku, jinghku jing yu ni hpe kabu shangun ai kasha gaw byin wa sai....ya gaw Nu a shing na lasik hpe mung nmu ga ai grai na mat sai..tim..dai shing na lasik hpe grai chyeju dum ai.....

Ndai zawn lam woi wa ai , sharin ya ai Ah Nu hte Ah Wa hpe grai chye ju dum ai.
Ya dai ni ...Nu yang Wa de wa ai Hkristan ding hku 28 ning hpring sai....
Pyaw tim yak tim ngai kasha hpe ra rawng ai lam n-nga hkra tsawra myit hte shalum ya ai...mungga hte sharin ai, malu masha hte bau rem ai, Hpaji byengya hpe galu kaba shangun ai Nu hte Wa hpe Ngai kasha tsun dang hkra chye ju dum ai yaw.....Karai Kasang kaw na myit simsa kabu gara ngwi pyaw ai shaman chyeju Nu yan Wa ntsa tut nawng anga nga u ga yaw....tsawra ai kasha kyuhpyi ya dat ai....