Ngai gaw......

Shat jahku lu , Hpa sha hpa sha ra ai ni hpe malap let
wo re si mai ndai si mai nka sha ai ngu sara galaw ai NGAI

Sha na hpa nnga ai majaw hka lu na sha nga ai ni hpe malap let
hpum na tsang na shana shat gam ai NGAI

Shat bang lu na matu Hkoi shap nna shadu gun let bungli sa ai ni hpe malap let
shani shagu Nga chyu lu yang she nga pyaw ai NGAI

Nta ding hku langai shata mi shalaw na ram re gumhpraw hpe
lani mi hte sha jai kau na hpe atang ahpa sha myit ai NGAI

Hka grai taw ai shara buga ni hta nga ai ni hpe malap let
Nra ai sha hka law law lang chye ai NGAI

Maza hta tam let shat ngaw shat ngam tam sha ai ni hpe malap let
Maza maw daw makau lai hkrup yang ladi pat chye ai NGAI

Tinang a hkum hta htam law law kaba ai palawng hpe she hpun ra taw ai ma ni hpe malap let
Grai hkrak sai ngu ai Brand hpe she lata mari chye ai NGAI



NGAI HPE MARA RAW YA MARIT !!!

NANG .......

Ngai yup mang mu na ahkang lu ding yang
Nye a salum ni shamu nga ding yang
Ngai nang hpe tsawra nga na.

Ngai mu mada ai
Ngai na lu ai
Ngai shaga lu ai ahkang nga ding yang
Nang hpe mu njin, shaga njin, na nsen madat njin ai yaw.

Mungkan grin nga ding sa,
Nang , asak hkrung nga ding sa
Nye a salum hta gaw NANG sha madu re yaw.

Nye A Hkrun Lam II

Hpa ji lam hte seng na gaw yawng chye chalu sha re...jawng nnga ai.
Jawng nga ai mare hkan mung sharin sara nlaw ai , nnga ai sha n-ga, nga taw sai sara ni mun
tsang shi awng ai nnga ai.Tsang 6 , 7 awng da sai ni she sara bai tai taw ai majaw gaw
anhte myu sha ni na hpaji lam gaw myit tsang shara rai nga sai..
Hkahku ga de du hkawm ai shaloi Ngum la , Hting Nan hte Sumpra bum kaw sha lapran tsang hte lahta tsang jawng nga ai hpe mu da ai...
(kaja sharin ai /nsharin ai gaw nchye ai. jawng pat ten du da ai re majaw )
Jawng ma ni mung jawng gawk de sa na malai nam de shang yang she nta ding hku a matu grau akyu nga ai ngu hkam la ma ai...

Bai...Hkahku mung na mare ni hta Ramma ni nlaw ai hpe mu mada lu ai.
Jamaw de baga ga sa ai lam na lu ai...
Asak kung sai ni hte ma kaji ni sha mare sin let ngam da ma ai.
mare ni gaw katsi katsang rai nga sai.....
Mare masha ni gaw anhte hpe grai myit mada ai re. ..shahte a buga galu kaba hkra sa ap nawng na matu hpyi shawn ma ai.
Anhte mung moi gaw hkahku mung na lam na sha na ga tim...ya gaw gara hku byin taw sai masa hpe mi hte chyaw sa mu da sai majaw myit hta grau hkra ai .

Ndai Hkahku hkrun lam gaw ngai na matu No. 1 lang na mahkrum madup re majaw mare masha ni a man hta nhtap nhtuk
tsun shaga ,hkawm sa lai ai sat lawat ni law law rai mat ni ai....
Anhte ni gaw mare langai de du shang wa ai hte ma ni hpe muk seng nga /nnga shawng san ai. ( grai sha mayu na )
Tim....ma ni gaw anhte a gasan (muk seng ) ngu ai a lachyum pyi nchye ai....shanhte a prat hta muk ngu ai hpa rai ta ??
Dai sha n-ga , mare de du shang wa yang U nga nnga mung grai lagyim yu lai wa sai. ( U hpa hpa sha na matu )
Anhte hkum anhte grai nan pu ba ai zawn hkam la kau ai.....du ai hte mare masha ni hte hkrum shaga aten law law nlu jaw ai sha tinang ba ai hpe sha jahpai ai ten ni mung law law rai sai....
Tim.....mare masha ni yawng gaw anhte ni hpe grai chye na ai hte shanhte kaw lu malu yawng hte hkap tau hka lum la ma ai........Tinang galaw lai wa sai lam ni hpe MKA de bai du wa ai shaloi she bai nhtang myit yu na grai nrai dum sai .
( grai nan gaya hpa she rai nga ai )
Dai majaw ngai gaw Hpang shaning ni hta mung Campaign bai hkawm na matu myit daw dan sai.
Hkahku hkrun lam a mahkrum madup hta lakap nna hpang shaning ni hta gaw grau shakut na matu myit da sai.

Nye a hkrun lam

16 January 2006

Nye a hkrun lam.....

2003 ning March shata hta myit run manang marai 10 hte rau Hka hku ga de hkrun lam hkawm lai wa sai.
Hkahku mung ngu ai gaw Mali hka hte Nmai hka lapran an  Mali Nmai walawng  , Mali hka hte Hkrang hka lapran na Mali Hkrang wa lawng ngu ai shara ni rai nga ai.

Anhte gaw Myitkyina mare lai Tang Hpre mare kaw na Mali hka hpe jakli hte rap nna Nmai hka hte Mali hka lapran kaw na lam hkawm ai hte Hkahku ga de mada let hkawm sa wa sai.
Du gawna hkawm da sai mare ni gaw ,

1. Hkum Tsai Tawng Yang
2. Pung Sai Yang
3. Kawng Ra
4. Bum Ra
5. Ja Htu Yang
6. Njung , Njun
7. Share Uma
8. Jingma
9. Nba Bum
10.N-Gum La
11.Dapba Daju 1
12.Nrawng Kawng
13.Law hkum
14.Ngaw Hkyet
15.Salaw Ding Ngut
16.Htingbu kawng
17.Hkin du ga
18.Bum Wang mare
19. Hting Nan mare
20.Dari Daru ( ja maw)

Ndai hkahku hkrum lam hta malap nlu ai sahra ni law law re. W.P sha ni a labau shang shara ni hkan mung du hkawm da sai. Mahtum , Njung Njun hte Naw Lang ngu ai mare ni gaw nat jaw mare ni naw rai na ai. Naw lang mare na nta law law ai shawng hta Nga , wuloi baw ni shakap da ma ai.Nta kata hkan mung Nat hkung ri kasha ni san san tawn da ma ai.Dai hkung ri kasha kaw shawng Nat hpe shaga la nna, Nat wa hpyi ai Nga , wuloi ni hpe nawng na matu gaw shing gan na Hkung ri kaba kaw she nawng jau ma ai.

Share Uma hte Hkum Boi mare Uma de sa ai hkrun lam na kadawng hte bum ni hpe gaw prat tup nmalap lu hkra nan lai di wa sai shara ni re nga ai. Shinglang she tsu, lahput she gayut na daram bum lung / yu galaw da sai majaw re.Ndai bum ni kaw na yu dat yang Mali hkrang wa lawng ngu ai sahra nin hpe summwi ni kaup nga ai lapran kaw na mu lu taw sai re.

Hka hku bum ntsa de du wa sai majaw , Chyangau U ni a nsen ni a pyaw ngawn ai nsen hte marit maroi hkap tau ai hpe hkam la lu ai.Dai hpang , Ngaw Yi hte Ngaw La ngu ai Bum lahkawng ai lapran hkyet kaw de da ai  Ngaw Hkyet ngu ai mare de du da sai. Ndai mare gaw hting gaw  6 sha nga ma ai re. Mare hta hku hku ai majaw anhte sht pyi nkatut ai , nai hte shingrun gayaung na sha lai sai.Dai mare kaw na ni shaga ai gaw " Minla " ga re . Mare na hpung sara wa she anhte hpe ga byan dan ai hku re.

Mali Nmai walawng kaw gaw mare langai hte langai nau ntsan ai majaw mare law law kaw sa du shang da lu ai re.Hkahku mung na mare baw ni hta Wudang shajun da ma ai.Dai majaw ngai gaw lamhkawm grai ba wa yang Wudang hpe sha grai mu mayu ai . Wudang mu yang mare du sana ngu ai hpe chye sai .Dai majaw ndai Hkahku hkrun lam hta gaw Wudang gaw anhte yawng a myit mada shara rai nga ai.

Anhte a sai daw sai chyen ni a kan bau magam bungli gaw hkrng yi hta mam hkai sha ai hta lai nna kaga bungli nchye galaw sha ma ai.Bu hkrawp hpun hte tsabyin hpun ni hkai da tim gat lawk nnga ai sha nga , tang du hkra mung nchye galaw sha ai hpe mu lu ai....bum langai hpe nat yang  3 ning gaw mai hkai sha sai...dai majaw 3 ning jan hta kalang yi nat ai majaw bum krin ni hkrai rai wa sai hpe myit npyaw na zawn sa mu da ai.
Tim...kawa hpun kaba ni gaw grai naw ngam ai hpe mu da ai....le..nam kata hkan moi na jiwoi ni a " Lup Hka " ngu ai hpe mung sa mu da ai re...shanhte a Lup ni gaw dawng 30 daram nan dam ai hpe mu lu ai.

bai matut na .....

2009 hte Ngai

10 January 2009

Mungkan masha ni yawng Ngwi pyaw nga mu ga yaw !!!

2008 ning gaw ngam da sai...2009 ning de myit mada lam ni law law hte ngai bai du shang wa sai ....lai sai shaning hta kabu ai, myit ru ai, myit daw ai, myit shuk ai, Karai hpe pyi malap hkra pyaw lai sai ten ni hpe bai myit dum na SHI chyeju ni hpe bai sawn yu ai....

Ngai kade wa yak hkak ai, myit ru ai nga tim, ngai hpe hkam jan tawt lai lu na myit ngun jaw ai majaw mung SHI hpe grai chyeju dum ai...

Ya ,ngai kalang mung grai ndu yu ga shi ai 2009 ning a shani shagu na asak hkrung lam hta mung SHI jaw ya na ngun hpe sha myit mada let tawt lai lu na re ngu kam nga nngai..
                   ________________________________

Ngai buga de wa na Ygn de bai du wa ai 4 ya dang na wa tim nye myit ni gaw atsawm nlu kahkyin taw nga ai....buga de chyu dum....hkrap mayu ai zawn zawn,, mani mayu ai zawn
zawn....
lamu de mada dat yang jan mung shawoi na hta grau ja taw ai zawn,
mu ai masha , arung arai , du sat, hpun ni du hkra hkraw hkraw hkra hkra ....
dai majaw ngai na matu kyu law law hpyi myit dum ya marit...
ngai mung kyu hpyi shaja ai hte  sha myit hpe shazim la nga nngai...